23 май дар Китобхонаи милии Тоҷикистон ҷаласаи 18-уми Форуми СҲШ ба кори худ идома дода, дар рафти ҷаласа кори Форум натиҷагирӣ карда шуд. Ҷаласаи рӯзи дуюми Форуми СҲШ-ро директори Маркази тадқиқоти стратегӣ Хайриддин Усмонзода оғоз намуда, ба ҳайатҳои намояндагони кишварҳои узв, нозир ва шарикони муколамаи СҲШ ва дигар коршиносонону таҳлилгароне, ки дар кори Форум ширкат намуданд изҳори сипос намуда, қайд кард, ки таҳкими робитаҳо ва тақвияти ҳамкориҳо дар доираи Форуми СҲШ барои ҳамаи давлатҳои узви Созмон муҳим аст.
Ҳамзамон, иштирокчиёни Форум ба роҳбарияти Маркази тадқиқоти стратегии назди Президенти Ҷумҳурии Тоҷикистон барои дар сатҳи баланд баргузор намудани ҷаласаи 18-уми Форуми СҲШ миннатдории худро баён намуданд.
Маврид ба зикр аст, ки дар фарҷоми рӯзи дуюми ҷаласаи 18-уми Форуми СҲШ протоколи ҷамъбастиии ҷаласа аз ҷониби роҳбарони марказҳои таҳлилии кишварҳои узви СҲШ имзо гардид.
Дар охири ҳамоиш маросими вогузор намудани раёсати Форуми ШОС баргузор гардид. Директори Маркази тадқиқоти стратегии назди Президенти Ҷумҳурии Тоҷикистон, раиси Форуми СҲШ Хайриддин Усмонзода ба таври тантанавӣ рамзи Форуми СҲШ-ро ба директори Пажуҳишгоҳи таҳқиқоти стратегӣ ва байниминтақавии назди Президенти Ҷумҳурии Ӯзбекистон Элдор Орипов супорид. Ҷониби Ӯзбекистон солҳои 2023-2024 раёсати ин созмони бонуфузро ба уҳда дорад.
Ҷаласаи 18-уми СҲШ-ро директори Маркази тадқиқоти стратегии назди Президенти Ҷумҳурии Тоҷикистон Хайриддин Усмонзода натиҷагирӣ ва ҷамъбаст карда, ба иштирокчиёни ҷаласа изҳори сипос намуд ва изҳори боварӣ кард, ки ҳамоиши баргузоршуда барои рушду густариши ҳамкориҳои судманди минбаъдаи байни кишварҳои узви Созмони Ҳамкории Шанхай мусоидат хоҳад кард.
Ҳамоиш дар рӯҳияи самимият, ҳусни тафоҳум ва муколамаи созанда доир гардид.
Хадамоти матбуотии Маркази
тадқиқоти стратегии
назди Президенти
Ҷумхурии Тоҷикистон
